daan-daanan ko lang dati’t ngayon ay aking natitigan

sa bintana pa lang ay magaan na ang aking kalooban

may isang taong nakangiti’t nakaabang sa aking daanan

pagpasok ko sa loob ay panatag ako’t agad sa may bukana

maayos na nakasalangsang ang mga bagay at kahali-halina

isa-isa ko itong tinitingnan O ang mga mata ko’y nagpipista

gusto ko sanang hawakan ang isa ngunit baka ako’y masita

hinayaan kong ang aking mga paa’t animo sila’y hinihila

magaan pa rin ang aking pakiramdam at wala kasing dala

hanggang sa mapadako ang aking tingin doon sa isa

kakaiba siya’t lumapit ako’t malalim ang aking buntong-hininga

siguradong isa siyang primerang bagay at aking napagmasdan

katabi niya’y isa pang uri’t binuhat ko’t nawalan ng kabuluhan

may isa pang katabi ngunit hitsura pa lang ako’y nag-aalinlangan

hindi! iyon ang ibig kong bitbitin at ang aking napagpasyahan

napag-isip isip ko lang kung kakayanin ko’t may kabigatan

sa aking pag-iisa’y nasanay na ako’t hindi na siguro kailangan

umikot-ikot pa akong muli’t may ibang tao pa kasing dumadaan

subalit ang taong nakangiti’y may itinuturo’t iyon daw ang balikan

naibigay na siguro sa akin ang lahat ng senyales at huwag kabahan

hindi ko ngayon malaman kung paano bubuhatin at maselan

hawak ng aking dalawang kamay ang nais kong makamtan

ipinangako sa aking sarili’t hindi ako bibitaw at aking pagkaka-ingatan

lumalakad nga ako ng dahan-dahan at lumiliko ng hindi inaasahan

iba’t-ibang mga kumikinang na bagay at tinatawag pa rin ako minsan

alam kong hindi ako makakalayo at habang hawak pa’y hindi lilisan

kahit gaano katindi pa man ang aming pagsubok na pinagdaanan

pagdating sa dulo’y may nakasalubong akong nagtatakbuhang mga bata

ilang beses akong nabangga’t kamuntik na sana’t gusto kong mairita

nag-iinit ang aking mga palad at walang saklolo naman akong nakikinita

hindi naman niya gustong kumawala’t mag-ingat lamang sa pananalita

sa kahabaan ng daan ay papunta na ako sa kahera’t ako’y nagpapawis na

mainit ang panahon at malamig na ang aking ulo’t nakabawi-bawi na

mahaba ang pila’t wala bang shortcut ngunit teka siya’y magaan na

pinagmasdan kong muli’t isang matinding kasiyahan at siya’y akin na